سريت شقور (لروحك السلام والفخر)
صرختنا ووجعنا كبير، اكبر من ما بتتصوروا! جرائم العنف والقتل بالمجتمع العربي بشكل عام عم بكونو وحدة ابشع من سابقتها، والجريمة الأخيرة بحق سريت وبحق المجتمع العربي الكويري صعب نهضمها!
بس احنا عارفين/ات من وين نبلش
مين يللي بيعطي الحق والشرعية للقتل؟
ولا حدا!!! لا انا، ولا انت ولا اي انسان! فش شرعية للقتل، ولا لاي سبب!
ميولنا النا، روحنا النا، كونك أخونا/ أبونا/ إبن عمنا.... شو ما كان تعريفك ما إلك أي صلاحية علينا، ولا على اي حدا منا!
بشهر الفخر، الشهر اللي فيه منحتفل بهويتنا الجنسية والجندرية - يمكن تفكروا كلماتنا ضايعة، بس لا! صوتنا عالي وقوي. وعلى كبر الحزن والوجع، ممنوع ننسى: إحنا مش جزء لا يتجزء من المجتمع، احنا المجتمع، واحنا باقين وباقيات هون ومش رح نروح ع محل، ورح نضل دايما احنا المجتمع.
مثليات ، مثليين، عابرين/ات جنسيًا وكل جزء من مجتمع الميم-عين باقين/باقيات لآخر يوم بهالكون، إحنا صوتنا عربي وعالي ورح يبقى دايمًا عربي وعالي وفخور! ومندعي كل مين بآمن بالحرية والعدالة ينضم لنضالنا. لان سلاحكم/ن ما بيخوفنا.
كتير منتوجع على جريمة مبارح، ومنتمنى روح الملاك سريت تكون بمحل أنظف من هالبشرية!
ومهم نتذكر انه احنا اشخاص، النا اسماء ومش ارقام!
سريت شقور، لروحك السلام والفخر